Прв разговор помеѓу Бајден и Нетанјаху по повеќе од еден месец
Новите случувања на релација Израел – Газа, вклучувајќи ја и ситуацијата во Рафа, напорите за зголемување на хуманитарната помош за Газа. Ова биле главните теми на кои разговарале Американскиот претседател Џо Бајден и премиерот на Израел, Бенјамин Нетанјаху.
Белата куќа соопшти дека разговорот кој се случил во понеделникот, е прв разговор по повеќе од еден месец, во екот на зголемените тензии поради израелската офанзива во Газа.
Двајцата последен пат разговараа на 15 февруари, а Бајден е сè погласен во критиките кон Израел поради бројот на загинати Палестинците и страшната хуманитарна ситуација во Газа.
„Претседателот Бајден разговараше со израелскиот премиер Бенјамин Нетанјаху за новите случувања во Израел и Газа, вклучувајќи ја и ситуацијата во Рафа и напорите за зголемување на хуманитарната помош за Газа“, се вели во соопштението на Белата куќа.
Нетанјаху го отфрли притисокот од Вашингтон велејќи, неодамна, дека Израел ќе продолжи со планот за офанзива во градот Рафа во јужниот дел на Газа за да се уништи Хамас, палестинска организација која САД и Европската унија (ЕУ) ја прогласија за терористичка организација.
Со предупредувањето од ОН за неизбежен глад во Газа, Бајден претходно овој месец и нареди на американската војска да започне со авионско фрлање храна во енклавата и испраќа американски сили да изградат пристаниште за привремена помош.
Во исто време, САД продолжуваат да доставуваат милијарди долари воена помош на Израел.