Здружение „Напредни лозари“: Сè повеќе се откажуваме од лозовите насади
Цената за грозјето што ја добиваме од винариите е многу ниска, а ќарот ни е од субвенциите што ги дава државата, оценува Трајче Кулев, претседател на Здружението „Напредни лозари“ од Кавадарци.
– Она што го вети државата како поддршка на лозарите и како субвенциии, тоа и го исполни, но проблемот е кај винариите кои даваат многу малку пари. Тоа пак, принудува се повеќе лозари да се откажуваат од обработка на насадите. Еве конкретно јас, обработував 4 хетари, сега обработувам 2, но почнувам да се мислам дали да продолжам и со нив – изјави Кулев за „Слободен печат“.
Тој објаснува дека од 2 хектари може да набере 15 тони грозје, но дека за тој труд нема да добие соодветен износ на пари.
– Гледаме дека се’ поскапе, и репроматеријал и гориво. Ако не се зголемат цените што ги исплатуваат винариите, се’ помалку лозје ќе се обработува – заклучува Кулев.
Според неговите пресметки грозјето сега е исплатливо ако од 1 декар се наберат повеќе од 1.500 килограми.
– Ако има толкави количини, односно толкав род, тогаш ќе паднат шеќерните единици и такво грозје не ни го примаат винариите. Така, под услов и да има наводнување и одлично да го обработуваме, мора да се задоволиме со род од 1.200 до 1.300 килограми по декар – објаснува Кулев.
„Тиквеш“ како најголем откупувач на грозје, лани во септември објави дека ги почитува договорените цени од 11 денари за смедеревката и 13 за вранецот. За дел од производителите “Тиквеш“ лани ги затворија вратите, односно им го вратија грозјето затоа што не беше со понизок квалитет и шеќерност и понудија да го преземат за преработка во вински дестилат.
Лозарството пак, се смета за една од стратешките гранки во Македонија и од извоз на вино минатата година се добиле 49 милиони евра.