Издавачкиот центар „Три“ ја промовираше збирката есеи „Господ, па Америка“, новата книга на Румена Бужаровска. Промоцијата се одржа на 15 април во „Јавна соба“ во Скопје и се одвиваше низ разговор меѓу Ивор Мицковски и авторката Румена Бужаровска.

Првобитно есеите беа објавени на српски јазик во онлајн списанието „Велике приче“, а сега го добиваат и своето прво македонско издание. Есеите во книгата содржат лични гледишта и критика кон современото општеството.

– Америка е синтеза. Точка на вриење. Почнувајќи од најраното детство во Аризона и во американските училишта, па сѐ до средби што го менуваат животот и познанства што не стигнале да прераснат во пријателства. Во овој свет што ја создава осаменоста – тешко е човек да се потсетува. А камоли да напише длабоки есеи, кои не се само критичко видување, туку истовремено и личен, вонвременски дневник. Молитвите завршуваат со амин, животот со смрт, есејот со точка (најчесто). Ретко, токму како во овој случај, завршуваат во книга која е опасна за припадноста на читателот. Ќе го предизвика да си припаѓа себеси, без разлика во која земја живее – стои напишано на корицата од книгата што предизвикува да се прочита во еден здив.

По досегашните четири збирки раскази, Румена Бужаровска ја збогатува домашната литература со збирка есеи. Неоспорен е успехот со кој таа се закити со претходните книги раскази – превод на повеќе од 15 светски јазици, десет домашни изданија на „Мојот маж“, театарски претстави во регионот според ова значајно книжевно дело, место на топ-листите на светските книжевни платформи – книга на неделата во Германија според „Шпигел“, прв македонски автор објавен од францускиот реномиран издавач „Галимар“, најнов превод на грчки јазик…

И за есеите веќе има одличен одѕив од домашните и од авторите од регионот.

(Текстот е објавен во „Културен печат“ број 227, во печатеното издание на весникот „Слободен печат“ на 20-21.4.2024)