Припадниците на косовската полиција утрово во голем број биле видливи на сите раскрсници и улици кои водат до зградата на општина Северна Митровица.

Полицијата од рано изутрина во голем број е распоредена околу самата зграда на Општината.

Полициски службеници ангажирале и возило кое отстранува непрописно паркирани автомобили околу главниот мост на Ибар.

Ситуацијата во градот на Ибар е мирна, но забележлива е тензија. На местата каде што има полицајци помал е бројот на граѓани кои главно избегнуваат да се движат по тие улици и ги прашуваат новинарите што се случува и зошто од утрово има толку многу полицајци во градот.

Да потсетиме, во 11:00 часот треба да положи заклетва новоизбраниот градоначалник на Северна Митровица, Ерден Атиќ,од партијата Самоопределување,  кој победи на изборите на 24 април, кои ги бојкотираа Србите.