Научниците се загрижени дека до пролет идната година би можеле да имаме нова варијанта на коронавирусот, која ќе биде отпорна на вакцината.

– Колку побрзо примиме бустер-доза на вакцината, толку подобра ќе ни биде состојбата во следните неколку месеци. За жал, секое предвидување што досега го имав, се реализираше. Се надевам дека овој пат грешам, но мислам дека до март, април или мај ќе имаме варијанта на вирусот која е целосно отпорна на вакцината. Едноставно не можеме да имаме толку ниска стапка на вакцинирани во светот додека вирусот се шири како пинг-понг топчиња меѓу вакцинираните и невакцинираните. Јас сум имунолог. Веројатноста дека наскоро ќе имаме вирус отпорен на вакцина е многу голема – рекол имунологот, д-р Марк Дајбл, професор на Универзитетот во Џорџтаун.

Угледниот имунолог смета дека ќе дојде до напредок во терапиите и вакцините како би се стопирало масовното ширење на таа варијанта на вирусот и вели дека и спрејовите за нос би можеле да помогнат во неговото спречување.

– Мислам дека такви производи ќе имаме во следната година и половина. Долгорочно таа состојба ќе се доведе во ред, но следните година и половина може да ни биде многу тешко – додал тој.

И американскиот научник и имунолог Ентони Фаучи во септември предупреди дека може да дојде „монструозна варијанта на вирусот“ во споредба со која сојот делта би изгледал слаб.

– Секогаш постои ризик дека, колку повеќе вирусот циркулира во општеството, ќе се појават нови мутации што ќе бидат значајно поинакви и различни од сегашната варијанта на вирусот што е присутна – рекол тогаш Фаучи.