За нецел месец во полошко санкционирани 200 возачи кои возеле без возачка дозвола
Во текот на овој месец, заклучно со денеска на подрачјето на СВР Тетово вкупно се откриени и санкционирани 200 лица (ТЕ-164 и ГВ-36) кои ги управувале возилата без положен возачки испит и валидна дозвола за тоа.
„Во изминатите девет месеци од годинава, пак, вкупниот број на санкционирани лица на ова подрачје изнесувал 1653 (ТЕ-1219 и ГВ-434). Претежно станува збор за помлади лица кои во најголем број управувале патнички моторни возила, иако претходно не ја посетувале предвидената теоретска и практична обука и не го положиле задолжителниот возачки испит. На сите им се изготвени поднесоци со парична глоба од 250 евра во денарска противвредност, како и на сопствениците на возилата кои им ги дале да ги управуваат, иако знаеле дека немаат дозвола“, изјави портпаролот на СВР Тетово Марјан Јосифоски.
Секторот за внатрешни работи Тетово и оваа година во континуитет спроведува редовни и акциски контроли во чие средиште, покрај другото, се и овие лица и апелира да не се седнува зад управувачот без положен возачки испит.
„Зашто, необучените возачи ја доведуваат во ризик сопствената и безбедноста на другите учесници во сообраќајот. Ова, посебно се однесува на младите-адолесценти кои и без дозволи возат пребрзо и најнепосредно ја загрозуваат вкупната сообраќајна безбедност“, вели портпаролот на СВР Тетово Марјан Јосифоски.