Денеска повторно се шпекулира дека Веселин Вујовиќ ќе се врати на клупата на „црвено-црните“ како наследник на Стевче Алушовски.

Како што информира „Планет Хандбал“, од следната сезона искусниот стратег Вујовиќ, ќе го води Вардар 1961.

Клубот е на добар пат да ја одбрани титулата во домашниот шампионат, а во Лигата на шампионите сезонава доживеа елиминација во осминафиналето против Веспрем.

Вујовиќ веќе ја водеше екипата во периодот од 2006 до 2009 година, освојувајќи неколку титули пред „златната ера“ со Сергеј Самсоненко кој стана сопственик во летото 2013 година.

Моментно Вујо е на клупата на босанскиот тим Борац Бања Лука борејќи се за трофејот во тамошното првенство со ХРК Извиѓач.