Околу 200 припадници на Националната гарда на Тексас се распоредени во областа на Чикаго за да го заштитат федералниот имот, вклучувајќи ги зградите на Службата за имиграција и царина (ICE) и други федерални објекти, соопшти Северната команда на САД, пренесува НБС Нјуз.

Портпаролот на командата изјави  дека војниците пристигнале во Резервниот центар на американската армија во Елвуд, околу 55 милји југозападно од градот, каде што им се придружиле околу 300 војници од Илиноис.

Вкупно 500 војници ќе бидат активни 60 дена, а детали за нивното оружје не беа објавени.

Распоредувањето предизвика силни реакции од демократските лидери и локалните власти, кои се противат на присуството на федералните сили во градот.

Судско рочиште за ова прашање е закажано за четврток, додека окружната судијка на САД, Сара Елис, објави дека може да ја ограничи употребата на солзавец и други уреди за контрола на толпата против мирни демонстранти.

Градоначалникот на Чикаго, Брендон Џонсон, го осуди распоредувањето, нарекувајќи го „авторитарен потег“ насочен кон „поттикнување страв и кршење на Уставот“.

Апелацискиот суд ја разгледува одлуката дали да се испрати Националната гарда во Портланд, каде што федералните власти побараа воспоставување „зони за слобода на говорот“ за демонстрантите.