Во Градската библиотека „Браќа Миладиновци“ – Скопје на 5 март се одржа разговор со писателката и преведувачка Калина Малеска. Романот „Светот што го избрав“ на Малеска е книга за месец март во сите библиотеки од мрежата на ГБСК и дел од големата кампања „Читаме современи македонски автори“.

Модератор на разговорот беше Александра Јуруковска, а фрагменти од делото прочита актерот Андреј Серафимовски. Разговорот беше многу искрен и отворен.

– Сакав да напишам книга за лик што се развива и во зрели години, сакав да избегнам да создадам карактер што по промената останува ист. Тоа и како читател ми пречи. Ликовите стануваат нeкaкви херои и остануваат исти следните 30 години. Сакав да покажам дека зрелата жена/човек може да се менува, потребна ѝ е храбрст, но и тука внимавав таа промена или тој крај да не биде нагло, одеднаш, среќен. Сакав да пишувам за слободата и прифаќањето, за детството без идеализирање, за врсничкото насилство кога сѐ уште не го дефиниравме така и за нашиот начин на (не)справување со него – рече Калина Малеска за својот роман „Светот што го избрав“.

Калина Малеска е авторка на четири збирки раскази, три романи, драмата „Случка меѓу настани: Хипатија од Александрија“ („Слово“, 2010), две книги за деца, книжевни студии, како и уредник и коавтор е на студијата „Кон-текстот: дигитални осврти“ (самостојно издание, 2023).

Таа е професорка по англиска книжевност на Филолошкиот факултет „Блаже Конески“ при УКИМ во Скопје, а нејзини статии поврзани за книжевни истражувања се објавени во домашни и меѓународни списанија. Се занимава и со книжевен превод.

(Текстот е објавен во „Културен печат“ број 271, во печатеното издание на весникот „Слободен печат“ на 8-9.3.2025)