Седумнаесет ерменски војници беа убиени во нови борби во Нагорно Карабах со што вкупната бројка е 542 од избувнувањето на вооружениот конфликт на 27 септември, соопштија денеска официјални лица на самопрогласената република Нагорно Карабах.

Во судирите што избувнаа во Нагорно Карабах од 1990 година, загинаа околу 30.000 луѓе.

Нагорно-Карабах е енклава во Азербејџан населена со Ерменци и од војната во првата половина на 90-тите години владата во Баку нема контрола над таа територија.

Обновените судири помеѓу Азербејџан и Ерменија во Нагорно-Карабах ескалираа на 27 септември. Двете земји прогласија воена состојба и општа мобилизација и пријавуваат жртви, вклучително и цивили.

Од 1992 година се одржуваат преговори за мирно решавање на судирите во рамките на Организацијата за безбедност и соработка Минск групата, со која претседаваат Русија, САД и Франција.