Минатиот викенд, по една година пауза, во Друштвото на писателите на Македонија (ДПМ) се одржа традиционалната меѓународна книжевна манифестација „Празник на липите“, основана во 1996 година.

Настанот траеше два дена: на 13 јуни беше врачувањето на наградата „Книжевен жезол“, а на 14 јуни беше поетското читање „Празник на липите 2025“.

Домашен добитник на наградата „Книжевен жезол“ годинава е поетот Славе Ѓорѓо Димоски, кому наградата му беше врачена од претседателот на ДПМ, Живко Грозданоски. На свеченоста присуствуваше и претседателката на Македонија, Гордана Сиљановска-Давкова, која ѝ ја врачи наградата „Книжевен жезол“ на реномираната поетеса Радмила Лазиќ од Србија.

Следниот ден, на поетското читање „Празник на липите 2025“ учествуваа петнаесетина поети, членови на ДПМ, меѓу кои Сузана Мицева, Милчо Мисоски, Искра Донева, Фима Клетникова, Каљош Челику, Даниела Андоновска-Трајковска, Ивица Челиковиќ, Лулзим Хазири, Вања Изова-Велева, Љубинка Донева, Борче Панов, Лејла Шериф Емин и Дејан Трајкоски.

Обата настани имаа и музичка позадина: на доделувањето на наградата „Книжевен жезол“ настап имаше Елена Христова и етно-групата „Баклава“, која оваа година одбележува две децении постоење, а на поетското читање „Празник на липите 2025“ свој заеднички настап имаа Ана Трсунова на флејта и Луна Пилиќ на гитара.

На отворањето на манифестацијата, претседателот на ДПМ Грозданоски во својот говор искажа надеж дека „Празник на липите“ ќе ја возобнови својата врска со градот Скопје: не само со градот како покровител на меѓународната манифестација на ДПМ, туку и со организација на културни настани на повеќе локации низ градот.

– Тука го подвлекувам изразот „меѓународна манифестација“ затоа што, како споредба, ако организацијата и доделувањето на „Традиционалните годишни награди на ДПМ“ – кои носат имиња на темелници на нашата книжевност и култура: Стале Попов, Ацо Шопов, Димитар Митрев и Ванчо Николески – е потфат што има најголем потенцијал за систематска промоција на домашната книжевност и домашните автори кај домашната публика, тогаш манифестацијата „Празник на липите“ е подвигот што прави да растеме отаде границите на нашата земја и нè поврзува со светот.

Низ годините, „Празник на липите“ се организирал на Матка, во Старата чаршија, во Градскиот парк, во МКЦ… и тоа треба само да биде поттик за „Празник на липите“ да биде празник на целиот град – како што има липи низ целиот град. Тука, би сакал да ја реактуелизирам и идејата за создавање „Парк на липите“, која ја покренала нашата поетеса Гордана Михаилова-Бошнакоска – истакна Живко Грозданоски, претседател на ДПМ.

(Текстот е објавен во „Културен печат“ број 286, во печатеното издание на весникот „Слободен печат“ на 21-22.6.2025)