Ова што се случува на полето на вештачката интелигенција во изминативе две години е навистина голема работа, но од друга страна е и предизвик и треба да се биде внимателен околу сето тоа и можеби за некои работи сe уште ти треба човек за да провери дали е точно тоа што компјутерот ти го кажал – вели Илија Стевков, претседател на МЕНСА – Македонија.

Во неговото гостување во утринската програма на Слободен печат, тој посочи дека само времето ќе покаже каде е лимитот на вештачката интелигенција.

– Во нашите џебови го имаме сето знаење на светот. Овој телефон е милиони пат појак од комјутерот што ја проби Енигма во Втората светска војна. Така да времето се менува, технологиите се менуваат, и на тој начин влијаат на луѓето и на општеството. Претпоставувам дека луѓето што пишувале научнофантастични новели пред 50 или 100 години не можеле да претпостават дека ќе дојде време луѓето ќе работат по 14 часа во фабрика, а компутерите ќе пишуваат поезија – вели Стевков.

Во четврток во просториите на ФЕИТ во Скопје со почеток од 18.30 чаот ќе биде организира тестирање за МЕНСА, а цената за учесниците изнесува 500 денари. На овој начин здружението се надева дека ќе дојде до нови членови.

– МЕНСА-Македонија е здружение на луѓето со натпросечна интелегенција, односно место каде членуваат они чиј резултат на тестирањето бил во рангот на 2 проценти од светската популација. Сепак, не секој што го поминал тестот потоа сака да биде наш член, а многумина, пак, не се активни членови, вели тој.

Сепак, токму бројот на активните членови ја одредува и позицијата на Македонија во меѓународни рамки, па делумно и затоа нашата земја е последнорангирана во споредба со преостанатите земји кои потекнуваат од некогашната југословенска заедница. Во меѓународни рамки, Македонија е зад Шпанија, но и едно место пред Канада.