Замислете да одите на работа во облаците, вашите работни обврски да ги извршувате на небото и првото утринско кафе да го пиете гледајќи во изгрејсонцето од најубавиот агол. Токму оваа рутина ја има Горан Најдоски, кој пет години работи како стјуард во авиокомпанијата „Визер“, а воедно е и нејзин бренд амбасадор за Македонија. Со него разговараме околу неговата работа, развивањето на кариерата и работните обврски на еден стјуард.

Најдоски смета дека оваа работа е идеалната за него. Претходно работел и канцелариска работа, за која сфатил дека не го исполнувала поради што побарал нешто поавантуристичко.

-Јас отсекогаш сакав да патувам и да запознавам нови култури, па по завршувањето на средното образование и факултетот, почнав да работам канцелариска работа од 9 до 17 часот. Некако тој простор ме загушуваше, често погледнував од прозорецот и велев дека ова не сум јас. Еден ден се одлучив да аплицирам на конкурсот на „Визер“ за стјуарди и бев среќникот кој беше избран од стотици кандидати – сподели тој.

Карактеристично за стјуардите е што немаат класично работно време, а и поради тоа имаат можност на флексибилни работни часови.

– Чувството да се работи во воздух е непроценливо. Како и секоја работа, така и оваа има свои предности и мани како кога станувате во три часот наутро, но кога ќе го испиете првото утринско кафе над облаци кога сите спијат, чувстото е непроценливо – додаде стјуардот Најдоски.

Се случува во текот на едно деноноќие да имаат од два до четири лета, а како што вели Горан, тој е ноќна птица и повеќе ги сака ноќните летови. Но, честа појава при летањето се и турбуленциите, поради што го прашавме како успева за време на летовите да им помогне на патниците кои се плашат од вакви ситуации.

– Турбуленциите се нормална и честа појава во летниот и зимскиот период. Ние сме обучени за тоа и поминуваме двомесечна обука во Унгарија. Некои од патниците уште кога ќе влезат во авионот нè известуваат дека се плашат од летање и затоа ги прашуваме каде седат за да им обрнеме повеќе внимание, ги информираме и дека има копче на кое можат да нè повикаат во кое било време од летот и со насмевка разговараме со нив и така се опуштаат – раскажа бренд амбасадорот за Македонија.

Во неговата досегашна кариера речиси и да немал стресни ситуации, но постои еден лет кој им измамил насмевка на сите патници и целиот екипаж.

– Во мојата петгодишна кариера сум немал такви ситуации, но затоа сум имал позитивни искуства како запросување на лет, на први јануари и тоа би го издвоил како нешто што ќе го паметам засекогаш во мојата кариера – изјави Горан, додавајќи дека ова се случило само еднаш во неговите пет години кариера.

Тој има посетено над 40 земји, вклучувајќи ги Европа и Америка, а омилени му се приморските дестинации како Барселона и Малта, а од прекуокеанските, Мајами.