Уште во средношколките денови кавадарчанецот Александар Витанов заминува за Америка каде паралелно студира два факултета, музичко образование и политички науки. Тој оваа година ја доби стипендијата „Шварцман“ (Schwarzman Scholars) и е единствениот Македонец што ќе се образова на овој престижен универзитет во Кина. Тоа беше поводот да се сретнеме со Александар и повеќе да се запознаеме со неговата инспиративна приказна.

– Учев во средното музичко училиште „Илија Николовски Луј“ во Скопје. Таму ја изучував трубата како инструмент. За време на средношколските денови заминав во Америка, во Мичиген го завршив средното образование. Високото образование го продолжив на „Бард колеџ“ (Bard College), каде студентите по музика задолжително мораат да одберат уште еден факултет. Јас одлучив моите хоризонти да ги продолжам во политичките науки – вели Витанов за „Слободен печат“.

По препорака од пријатели аплицирал за стипендијата „Шварцман“ и без потешкотии влегол меѓу новата генерација на овој универзитет.

– Стипендијата „Шварцман“ е програма којашто била основана за да се креираат новите лидери, не само од Америка, но и од цел свет, коишто ќе ја разберат Кина и местото на Кина во светот. Ова е многу важна програма, поради тоа што ќе ги креира наредните генерации, наредните млади луѓе, кои ќе имаат блиски конекции во Кина и кои ќе работат на решенија што ќе донесат мир во светот, а не само помеѓу Америка и Кина. Јас бев инспириран и затоа аплицирав. Се работи за навистина специјална програма, нема ништо слично во светот и ќе имам можност да запознавам многу луѓе како мене, луѓе коишто се докажани лидери, многу поуспешни од мене. Ова мислам дека ќе биде едно добро искуство кое ќе ми помогне во кариерата да можам да направам нешто добро, не само за мојата држава и таму каде што ќе одам, но исто така и за светот – вели Витанов.

За Витанов е интересно и тоа што во Америка веќе неколку години дава бесплатни часови по музичко за оние кои немаат финасии да си платат дополнително час.

– Јас кога учев уште во Скопје, моите немаа пари да ми платат бесплатни часови за да се доусовршувам. Бев принуден и ги молев добрите професори кога имаат можност да одвојат малку време за да ми покажат нешто дополнително од редовната настава. Во Америка сфатив дека се соочуваат со истот проблем. Приватните часови по музичко се многу скапи и има деца коишто не можат да си го дозволат тоа. На „БАРД колеџ“ открив дека има програма која им овозможува на студентите таму да покренат општествени иницијативи. Се охрабрив и да започнам нешто интересно кое еве трае и се развива низ годините – рече тој.

Интересот растел до таму што од неодомна нивната програма се проширила и за ученици од Кенија.