Филип Поповски – Фичо е еден од најпознатите готвачи на македонската гастрономска сцена. Како од правник, магистрант на Универзитетот во Стразбур станал готвач, раскажува за „Слободен печат“.

Вели дека кога им соопштил на родителите дека сака да стане готвач тоа ги шокирало, бидејќи имале други очекувања за неговата иднина.

-Имав малку отпор кај родителите. Велеа како со магистратура по право во странство, одеднаш, тоа го тргаш на страна и продолжуваш да работиш со ова што за тебе е комплетно ново. Им одговарав со прашање „Зошто да не?“- додава Поповски.

Неговата прва сериозна работа во кујната започнала со кетеринг-бизнис, каде што се соочил со реалноста дека гастрономијата е тешка и комплицирана работа.

– Многу е различно кога готвиш дома од љубов, за пријатели, за себе, и кога готвиш за гости што плаќаат за тоа што го правиш – објаснува Филип.

Иако не успеал веднаш да ги реализира своите идеи и имал падови, Поповски сè уште гледал на тоа како на важно и скапо училиште кое му овозможило да расте како готвач.

Љубовта кон готвењето не престанала, дури и кога имал и финансиски проблеми кои го натерале да го затвори својот веб-сајт за рецепти.

„Јас почнав да снимам во тоа време мои рецепти, видеа… Мислам дека тоа се можеби и првите видеа на Јутјуб од Македонија за храна“, додава Поповски.

И покрај сите потешкотии, не се предал. Неговата работа по кујни, прво во странство, а потоа и низ Скопје, му дала искуство коe го мотивирало да продолжи напред.

Еден од најважните моменти во неговата кариера бил кога добил понуда да стане бренд амбасадор за „кока-кола“.

За Поповски важноста на процесот на учење и личниот развој е првенствена мотивација за успешната кариера која е резултат на упорноста и посветеноста низ годините.

-Додека се развиваш, никој не ти вика ништо, ни „браво“ ни „супер“. Кога се развиваш ти викаат, лесно му е на него. Да, сега мене ми е лесно. Ама како сум стигнал до тука, е цел документарен филм – вели Поповски.

Филип постојано ги инспирира младите да ги следат своите соништа и да се борат за успех, без оглед на препреките на патот.