Растот на цените во угостителството го менува секојдневието. Сè почесто кафеаните и рестораните не се избор за дружење и уживање, туку луксуз.

„Слободен печат“ ги праша граѓаните колку често излегуваат, дали се задоволни од услугата во рестораните, дали има зголемување на цените и дали бакшишот сè уште е дел од навиката.

Некои велат дека одамна не биле во кафеана. Има и такви што излегуваат секојдневно, особено оние што живеат во странство и можат слободно да се опуштат од финансиски аспект.

– Ние сме од далеку, живееме во странство. Постојано доаѓаме, секоја вечер по кафеани или ресторани. Дома не правиме за јадење – вели еден од анкетираните.

Една госпоѓа вели дека буџетот може да се балансира.

– Пред два дена бев. Услугата беше перфектна. Младите доста се трудат, тоа многу мене ме радува. Бев презадоволна – вели таа.

За дел од анкетираните, услугата зависи од локалите во кои одат.

– Ако одиш во некој ресторан каде што е поексклузивно, мислам дека подобро сте услужени – велат тие.

Повеќето забележуваат дека цените се многу поразлични од порано.

– Едно е цената, стандардот на луѓето, и второ, за жал, се изгуби и онаа социјална компонента на дружење – додаде повозрасен господин.

Некои сметаат дека еднаш месечно можат да си дозволат кафеана.

– Еднаш во месецот мислам дека можеме – вели помладо момче.

Со ова се согласија и други анкетирани.

Бакшишот, според одговорите, сè уште се дава, како дел од навиката и културата.

Во анкетата се обративме и до угостителите. Еден од нив разочарано пред нашата камера рече дека неговата работа е падната поради инфлацијата.