Проблемот со нечистотијата во Скопје е тема што сè повеќе ги загрижува граѓаните. „Слободен печат“ ги праша граѓаните што мислат за хигиената во градот и има ли решение за ѓубрето што не се собира редовно?

Многумина се жалат на смрдеа и ѓубре по улиците, а дел од нив сметаат дека се потребни построги мерки и санкции.

– Јас сум стара скопјанка, и од година до година, за жал, гледам како Скопје се дави во „измет“ – вели една госпоѓа.

-Воопшто не е чисто – додава случаен минувач.

Друг сограѓанин смета дека надлежните треба да реагираат:

-Мислам дека треба да се преземат мерки, има надлежни тука што треба да го средат градот – вели тој.

-Премногу е нечисто. Немаме култура. Треба да има големи санкции. На пример, јас во странство кога бев, за „пикавец“ платив 50 евра – објаснува едно момче.

Повозрасен сограѓанин вели дека прво комуналните служби треба да се екипираат, да се опремуваат како што доликува на една престолнина.

Прашавме и туристи кои првпат го посетуваат Скопје. И тие го делат мислењето на скопјани.

– Ужасно е. Градот не прави ништо во врска со ѓубрето – вели еден Американец кој подолго време живее во Скопје.

-Стигнавме вчера. Реката не е чиста. Таму видовме многу нечистотија, но има ѓубре и покрај улиците – додава една госпоѓа од странство.