Необичната приказна започнува во 1938 година, кога истражувачи откриле човечки скелет во бунар кој се наоѓал во замокот Свересборг во Норвешка.

Оваа тврдина била изградена од кралот Свере Сигурдсон, кој владеел со земјата од 1184 до 1202 година и за тоа време често војувал (против локалните ривали, Данска и Шведска). Поради недостиг на средства, истражувачите само ги прегледале коските, а потеклото останало мистерија.

Но, сè се сменило неодамна, кога биле направени подетални анализи и конечно билe откриени детали за мистериозните посмртни останки, пренесува „Унилад“.

Откритието е објавено во списанието „Џурнал АјСаенс“ ( journal iScience ), каде што е опишано како изгледа жртвата, што е направено благодарение на технолошките иновации.

Се покажало дека дел од решението се крие и во старата нордиска литература. Научниците направиле врска помеѓу записот од 1197 година, во кој се споменува напад на замокот. Таму се наведува дека непријателските напаѓачи решиле да го фрлат телото на мртвиот во бунарот „за да го отрујат главниот извор на вода“.

A medieval saga told of a man thrown in a well. Scientists found him.
Free WaPo gift link:https://t.co/mo1deRaH7W

— Nicole Apostola (@niccommawoo) October 28, 2024

Врз основа на стари записи и анализа на пронајдениот скелет, истражувачите заклучиле дека се работи за истата личност, иако идентитетот останува непознат. Анализата покажала и дека тој најверојатно имал среден тон на кожа, сини очи и руса или светло-кафеава коса.

„Ова е првпат да се најде лице кое се споменува во историските текстови. Таму пишува дека војниците го зеле мртвиот и го фрлиле во бунарот, а потоа го покриле со камења. Во текот на 2014 и 2016 година беа извршени дополнителни ископувања кога беа пронајдени повеќе остатоци и однесени на испитување“, изјавил Мајкл Д.Мартин, професор на Универзитетот во Трондхајм.

Истражувачите сугерираат дека човекот имал помеѓу 30 и 40 години во моментот на неговата смрт. Тие веруваат дека тој е убиен со тап удар во главата.

„Жртвата на несреќата не е локален жител, бидејќи неговото потекло се враќа во одредени делови на јужна Норвешка. Ова сугерира дека непријателската војска фрлила еден од своите во бунарот“, додал главниот автор на студијата, д-р Мартин Елегард.

Тој истакнува дека археолошката наука, древната ДНК и генетските анализи им овозможуваат на научниците да ги одвојат фактите од фикцијата, што на крајот дава пообјективен и поцелосен поглед на човечката историја.