Фудбалерите на Реал Мадрид освоија важни бодови во Баскија против Алавес, намалувајќи ја разликата зад водечката Барселона. Натпреварот од 31 коло во Ла Лига на стадионот „Мендизороза“ во Виторија заврши со резултат 0:1 (0:1).

Стрелец на единствениот гол беше Едуардо Камавинга во 34 минута. Кралскиот клуб се мачеше, а токму тоа сакаа да го избегнат пред реваншот со Арсенал во Лигата на шампионите.

Карло Анчелоти не беше на клупата поради суспензија, а неговиот син Давиде го замени. Винисиус Жуниор и Џуд Белингам не беа во почетниот состав, тренерскиот штаб ги чуваше за реваншот со „топџиите“, а потоа Килијан Мбапе предизвика голем проблем со еден непромислен потег.

Французинот имаше опасен старт во 38 минута врз Антонио Бланко и доби црвен картон. Поточно, судијата Цезар Сото Градо го исклучи само по повик од ВАР собата, откако првично му покажа само жолт картон. Беше јасно дека тој беше заслужено исклучен.

За среќа на Реал, четири минути претходно, Камавинга ги доведе гостите во водство со ефектен гол од 17-18 метри.

Во 70 минута и домаќините останаа со фудбалер помалку, откако Ману Санчез, доби директен црвен картон, слично како и Мбапе.

Ова е прва победа за Реал по натпреварите со Реал Сосиедад (4:4), Валенсија (1:2) и Арсенал (0:3). Тимот на Анчелоти ја намали разликата во однос на Барселона на четири бода, а воедно ја зголеми и предноста во однос на третопласираниот Атлетико на шест бода.

Во следното коло, Реал Мадрид ќе гостува кај Атлетик Билбао, но пред тоа, има уште поважен натпревар на стадионот „Бернабеу“ против Арсенал, реванш натпревар од четвртфиналето на Лигата на шампионите по тешкиот пораз во Лондон.