Шпанскиот тенисер Рафаел Надал се пласираше во второто коло на мастерсот во Рим, откако го совлада Зизу Бергс со 2:1, по сетови 4:6, 6:3, 6:4.

Мечот траеше два часа и 47 минути, еднаш беше прекинат бидејќи на некој од трибините му се слоши, а Надал успеа да се извлече и да побегне од прагот на елиминација. Ова беше јубилејна 70 победа на Надал во Рим, каде што освои 10 титули.

Во првиот сет Надал поведе со 3:1, но потоа Белгиецот направи брејк и брзо израмни на 3:3. Пресуден беше деветтиот гем во кој Зизу направи брејк и потоа со свој сервис го реши сетот во своја корист.

Во вториот сет Рафа уште на стартот стигна до 2:0, Бергс подоцна не искористи две брејк можности, додека Надал првата сет-топка ја претвори во израмнување во сетови.

Во третиот сет Надал стигна до брејк во третиот гем и таа предност ја одржуваше до крајот. Во следното коло Надал го чека Хуберт Хуркач, седмиот носител на турнирот.