ВИДЕО | Павиќевиќ: Учениците се принудени на учебниците да гледаат како апсолутна вистина иако некои се навредливи
Сиромашните луѓе се луѓе со многу мали способности, се необразовани и работат работи како чувари, чистачи, кондуктери и слично, кои се многу малку платени и се доволни за основно преживување, а голем број од нив се корисници на социјална помош. Ова го пишува во учебник по Социологија за трета година гимназија кој очигледно е полн со стереотипи. За ова во Утрински брифинг разговаравме со Лука Павиќевиќ, претседател на Сојуз на средношколци.
-Јавноста веќе навикна да се покажуваат вакви погрешни работи во учебниците, оти ова не е првпат. Многумина од ученици при вакви ситуации реагираат кај професорите, а професорите пак јавно кажуваат дека тоа што го пишува не е добро кога станува збор за поотворени професори. Оние кои се поконзервативни строго се придржуваат до материјалот. Треба да се променат учебниците но и нашето гледање кон тие учебници, вели Павиќевиќ.
Тој додава дека се случувало деца на самохрани родители, од сиромашни семејства или слично, да мораат да репродуцираат вакви навредливи содржини за себе за да добијат подобра оценка оти не секогаш се исплатува конфронтација со професорите.
