ВИДЕО | Партизан го губи чекорот со Звезда, црно-белите и трет натпревар без победа
Тимот на Партизан полека како да го губи чекорот со Црвена Звезда за титулата во српската Суперлига. Денеска црно-белите и трет натпревар во низа останаа без победа, одигрувајќи 1:1 во рамките од 26. коло на гости кај Младост.
Во финишот од првото полувреме Младост стигна до водство со голот со глава на Петар Бојиќ и со резултат 1:0 се замина на паузата.
Тренерот на Партизан, Игор Дуљај направи измени уште на стартот од вториот дел и до 75. минута ги искористи сите пет замени. Нападите кон голот на Младост конечно дадоа резултат пред истекот на регуларниот дел. Немања Николиќ беше стрелец на голот по асистенцијата на Захид (1:1).
Партизан со ова реми има еден бод помалку од Црвена Звезда на табелата, но црвено-белите со победа против Раднички на свој терен ќе дојдат до четири бода предност. Ќе потсетиме, во минатото коло Партизан беше поразен од Напредак со 1:0.