ВИДЕО | Нов загрижувачки тренд: Милионер запали слика од Фрида Кало за да ја продаде како НФТ
Мексиканскиот претприемач и колекционер Мартин Мобарак го запали цртежот на култната мексиканската сликарка и икона на поп културата Фрида Кало, во рамките на неговата иницијатива Frida.NFT. „Арте Капитал“ минатата недела објави видео на Твитер на кое наизглед се гледа палење.
Препорачано
Според веб-страницата Frida.NFT, цртежот е оценет како автентичен од мексиканскиот трговец со уметнички дела Андрес Зигел пред да биде уништен во станот на Мобарак во Мајами, на приватен настан со 200 присутни.
Љубителите на уметноста се згрозени, додека мексиканските власти размислуваат дали Мобарак извршил кривично дело, пишува „Вајс“.
Историчарите на уметност и други експерти, пак, повикуваат на претпазливост и посочуваат дека не е сигурно дека ова е навистина оригинално дело на Фрида, а ја доведуваат во прашање и цената: Мобарак тврди дека е проценета на 10 милиони долари, но некои експертите веруваат дека износот е пренадуен.
„Целата работа е морничава“, вели Мери-Ен Мартин, една од водечките светски трговци со уметнички дела во Латинска Америка.
Мартин, која го продаде спорниот цртеж во два наврати; во 2004 година го продаде на една фондација, а во 2013 година на приватен колекционер; тврди дека никогаш не го продала делото на Мобарак и дека за него никогаш не ни слушнала, се до минатата недела.
Цртежот наречен „Fantasmones Siniestros“, кој Кало го нацртала во својот дневник, ги прикажува ликовите на дух, риба, патка, птица и метла, а при изработката се користени водени бои и мастило.
Мобарак тврди дека уметничкото дело го купил во 2015 година од приватен колекционер и дека поголемиот дел од времето го чувал во сеф. До контроверзниот настан кога цртежот беше запален пред околу двесте луѓе во Мајами.
Цртежот, „Fantasmones Sinisteros“ (1944), бил ставен во чаша за мартини со сув мраз и изгорен.
Страницата за често поставувани прашања Frida.NFT вели:
– Сликата е трајно пренесена во Метаверзум на 30 јули 2022 година.
Како што се наведува на страницата, Frida.NFT ќе помогне во финансирањето на уметничките институции за кои Мобарак тврди дека работел, вклучително и музејот Фрида Кало во Мексико Сити и Палатата на ликовни уметности.
Мексиканскиот Национален институт за ликовна уметност и книжевност објави соопштение во кое негира дека нивната институција некогаш примила донација или дека работела со Мобарак. Сè уште не е јасно дали музејот на Фрида Кало добивал средства од Мобарак во минатото.
View this post on Instagram
Дали самиот цртеж е автентичен, исто така е нејасно, но мексиканските власти рекоа дека планираат тоа да го истражат. Ако откријат дека цртежот е автентичен, Мобарак би можел да се соочи со правни проблеми.
– Во Мексико намерното уништување на уметнички споменици е кривично дело во смисла на Федералниот закон за археолошки, уметнички и историски споменици и зони – се наведува во соопштението на Институтот.
„Луѓето можеби мислат дека сум го уништил. Но јас не го направив. Вака му го давам на светот. Го давам на сите да го видат. Мислам дека тоа е подобро за светот и дека испраќа порака, додека во спротивно само би стоел во нечија приватна колекција“, вели Мобарак кој прикажувањето на оригиналниот цртеж сега се продава во форма на 10.000 НФТ (секоја по цена приближно еднаква на изност од 4.000 долари). (НФТ дигитален сертификат дека поседуваш некаков предмет што постои во виртуелниот свет).
Купувачите на НФТ ќе добијат слика со висока резолуција од предната и задната страна на цртежот, копија од сертификатот кој потврдува автентичност и „анимирани ГИВ-датотеки и кратко видео што може, на пример, да се проектира на ѕид“, пренесува „Вајс“. Информациите се, велат тие, од веб-страница која „го слави преминот на цртежите на Фрида Кало во метаверс“.
„Господин Мобарак сака да ја донесе работата на Фрида во метаверс и да ја искористи нејзината голема привлечност за да ја собере заедницата на колекционери, уметници и љубители на уметноста со цел да се спои светот на традиционалната уметност и растечкиот потенцијал на светот на дигиталната уметност…“, е објаснето и пренесено преку страницата на која можете да го погледнете овој чин, https://fridanft.org/.
Беше презентиран и наводниот доказ за автентичноста на цртежот; потпис на мексиканскиот трговец со уметнички дела Андрес Зигел од 30 јули, истиот ден кога бил запален цртежот. Со својот потпис тој потврдува дека верува дека навистина е „Fantasmones Siniestros“ на Фрида.
Веднаш по увидот на цртежот од страна на Зигел, последниот е предаден на приватна осигурителна компанија во чија сопственост бил до чинот на палење, вели Мобарак.
Но, во светот има толку многу лажни слики на Фрида Кало што дури и сертификатот за автентичност е под знак прашалник, особено затоа што не доаѓа од водечка аукциска куќа, вели Џејмс Олес, специјалист за латиноамериканска уметност на колеџот Велсли во Масачусетс.
Иако тој самиот не го испитал цртежот пред да биде запален и не може да коментира за неговата автентичност, Олес забележува:
„Тој ги уништи доказите кои можеа да потврдат дали цртежот е вистински или не. Зарем тоа не е погодно?“
Уништувањето и претворањето на уметнички дела во НФТ станува растечки тренд. Минатата година, британскиот уметник Демиен Хирст продаде 10.000 слики, секоја со соодветен НФТ. Потоа им даде на сопствениците на сликите една година да одлучат дали ја сакаат оригиналната слика или НФТ. 4.581 слики, чии сопственици избрале НФТ, имаат намера да ги запалат.
Згрозувањето на јавноста, пишува „Вајс“, не се намалува премногу ниту со ветувањата на Мобарак дека дел од профитот од продажбата на НФТ ќе го донира на организации кои поддржуваат тепани жени и деца со аутизам и на истакнати институции кои ја промовираат мексиканската уметност, како на пример, Музејот на Фрида Кало. Дури и да го исполни ветувањето, прашање е дали таквите организации воопшто би ја прифатиле неговата донација. Мексиканскиот Национален институт за уметност и книжевност, кој истражува дали е оригинал, соопшти дека нема да прифати таков придонес.
Најскапата латиноамериканска слика: „Диего и јас“ на Фрида Кало изложена првпат по 25 години
