Нови вознемирувачки информации за опсадата на Сараево ќе бидат откриени во новиот документарен филм „Сараевско сафари“ на словенечкиот режисер Миран Зупанич, кој треба да биде прикажан на претстојниот фестивал „АЈБ ДОК“ во главниот град на БиХ.

Во разговор за „Ал Џазира“, режисерот Зупанич вели дека во градот, кој повеќе од три и пол години беше опколен од силите на босанските Срби, функционирала бизарна пракса на „ловење луѓе“ – богати странци, главно од западните земји, плаќале големи пари за можноста да учествуваат во убивањето на недолжните сараевски цивили.

Почетна станица на овие „авантуристи“ бил Белград, од каде со хеликоптер или со автомобил биле превезувани до Пале. Не е познато колку такви „туристи“ допатувале во Босна, ниту се знае колку луѓе убиле, вели Зупанич. Озлогласените снајперисти за време на опсадата биле страв и трепет на сараевските улици, а нивните куршуми, според официјални извори, однеле 225 животи, а повеќе од илјада луѓе биле ранети.

Во опсадата на Сараево, која е најдолгата опсада на еден главен град во историјата на модерното војување, вкупно загинале околу 14.000 луѓе, од кои 5.434 биле цивили.

„Овој феномен и натаму е обвиткан во тајна, а ние успеавме делумно да го откриеме. За негова реализација бил потребен цел синџир на луѓе, почнувајќи од тие што ги нуделе тие „аранжмани“, па до тие што се грижеле за логистика и за организација на терен“, вели Зупанич.

Филмската екипа со години барала и нашла луѓе кои биле спремни пред камери да сведочат за феноменот „сараевско сафари“, но имало и такви кои одбивале, а некои прво се согласиле, а подоцна се предомислиле. Стравот, вели Зупанич, и по 30 години, уште е присутен.

Според сведоците, имало луѓе од Америка, канада, од Русија, Италија, кои биле доволно моќни да платат високи суми, кои не се наведуваат конкретно.

Според режисерот, ова е првпат таа страотна приказна да се отвори во јавноста, а тој наишол на информации дека постоењето на ужасниот „бизнис“ им било познато на западните разузнавачки служби, но тие не презеле ништо да го спречат.