Канадски наставник е на удар на критики за наводно користење на неговата лична веб-страница за да продаде речиси 100 уметнички дела на неговите ученици, што предизвика неверување и бес кај родителите, пишува „Гардијан“.

„Замислете вашиот 13-годишен син да се врати дома од училиште со приказната дека неговиот наставник по уметност ги продава цртежите на своите ученици преку Интернет за 94 долари по цртеж без да ги праша децата дали може да го направи тоа!? Тоа е сосема лудо“, објави родителот Џоел Де Белефеј на социјалните мрежи. „Сигурен сум дека не сум единствениот родител кој сака одговори.

Учениците од училиштето Вествуд во Монтреал дошле до неверојатно откритие откако ја прелистувале веб-страницата на нивниот учител по уметност. На страницата, тие ги нашле сопствените цртежи, достапни за купување на шолји за кафе, футроли за мобилни телефони и облека.

Наставникот, идентификуван од „ЦТВ Њуз“ (CTV News) како Марио Перона, не одговорил на барањето на „Гардијан“ за коментар. На својата веб-страница, жителот на Монтреал се опишува себеси како „доживотен студент на уметноста“ чии дела се појавуваат во приватни колекции во Канада, САД, Шпанија и Италија.

Сметките на социјалните мрежи поврзани со уметноста на Перон се отстранети, вклучувајќи ги и страниците на Инстаграм и Фејсбук.

Училишниот одбор во соопштение рече дека се „свесни за ситуацијата и ги сфаќаат овие наводи многу сериозно“, додавајќи дека истрагата е „во тек“ и дека одборот не сака да коментира, пренесува „Гардијан“.