Во две експлозии загинаа најмалку 50 луѓе, а десетици се ранети во близина на гробиштата во Иран каде се одржа церемонија по повод смртта на врховниот командант на земјата Касем Сулејмани, убиен во 2020 година во напад на американски беспилотни летала, објавија денеска иранските државни медиуми.

Иранската државна телевизија јави за првата, а потоа и за втората експлозија за време на церемонијата во југоисточниот град Керман, наведувајќи дека најмалку 50 луѓе загинале.

„Огромна експлозија се случи во близина на џамијата Сахеб ал Заман, каде што се наоѓа гробот на Сулејмани во Керман“, објави државната телевизија, додавајќи дека втората експлозија се случила неколку минути подоцна, пренесува агенцијата Франс прес.

Иранската агенција Ноурњуз јавува дека неколку плински боци експлодирале на патот што води до гробиштата и дека властите ја следат ситуацијата.

BREAKING:

Iranian state media reports an explosion near Kerman city cemetery where Qasem Soleimani is buried. pic.twitter.com/VIof5hkcdM

— Globe Eye News (@GlobeEyeNews) January 3, 2024

Си-Ен-Ен објави дека амбулантни возила се на пат кон гробиштата каде што стотици Иранци се собраа да ја одбележат смртта на Сулејмани.

„Нашите тимови за брз одговор ги евакуираат повредените, но толпите ги блокираат патиштата“, изјави Реза Фалах, шеф на Црвената полумесечина во провинцијата Керман, за државната телевизија.

Сулејмани, командант на елитните ирански сили Кудс, беше водач на иранските воени операции на Блискиот исток и беше убиен од САД во јануари 2020 година во Ирак.

Полуофицијалниот „Ноурњуз“ соопшти дека „неколку плински канистри експлодирале на патот што води до гробиштата“. Иранските државни медиуми цитираа локален функционер кој вели дека „се уште не е јасно дали експлозиите биле предизвикани од боци со гас или терористички напад“.

Државната телевизија ги прикажа спасувачите од Црвената полумесечина како им помагаат на ранетите на церемонијата, каде што стотици Иранци се собраа да ја одбележат годишнината од смртта на Сулејмани.