Британската тенисерка Ема Радукану не успеа да ја одбрани титулата на Отвореното првенство на САД во Њујорк, откако во првото коло загуби од 40 рангирана тенисерка во светот од Франција, Ализе Корне, по два сета 3:6 и 3:6.

Радукану, 11 тенисерка во светот, загуби по еден час и 40 минути и стана само третата тенисерка во историјата која го загубила првиот меч во Њујорк по освојувањето на титулата. Пред неа тоа им се случи на шампионката од 2004 година, Русинката Светлана Кузњецова и шампионката од 2016 година, Анжелик Кербер од Германија.

Французинката Корне во второто коло на „УС Опен“ ќе игра против Чехинката Катерина Синијакова.

Четирикратната гренслем шампионка Наоми Осака од Јапонија загуби во првото коло од Американката Дениел Колинс со 6:7 и 3:6.

Тоа е втор последователен Грен слем турнир каде Осака е поразена на стартот од натпреварувањето.
Во второто коло Колинс ќе игра против Молдавката Кристијана Букша.

Шпанскиот тенисер Рафаел Надал се пласираше во второто коло откако го совлада Австралиецот Ринки Хиџиката со 4:6, 6:2, 6:3, 6:3.

Тоа беше првиот меч на Надал, освојувач на 22 грен слем титули, на УС Опен од 2019 година. Четирикратниот шампион на УС Опен во второто коло ќе игра против Италијанецот Фабио Фоњини.