Госпоѓа Март де Флоријан избегала од Париз за време на Втората светска војна и никогаш не се вратила во својот раскошен стан. Кога го отвориле по повеќе од седум децении, светот останал без здив – времето застанало внатре, а меѓу прашливите предмети имало вистинско уметничко богатство.

Во летото 1942 година, додека нацистичка Германија го окупирала Париз за време на Втората светска војна, госпоѓа Март де Флоријан, истакната дама од високото општество и салонска убавица од Бел Епок, била принудена да го напушти својот луксузен стан во 9-тиот арондисман. Плашејќи се за својот живот, таа се преселила на југот на Франција, каде што живеела до нејзината смрт.

Иако никогаш не се вратила, де Флоријан послушно продолжила да плаќа кирија за станот во текот на целиот свој живот, држејќи ги вратите од својот дом затворени повеќе од 70 години. Дури по нејзината смрт во 2010 година, наследниците решиле да го отворат станот – и тогаш светот дознал за една од најнеобичните приказни на модерна Европа-пишува Бизпортал.

Кога експертите првпат влегле во просториите, пронашле сцена како од друга ера, пренесува Блиц.

– Се чувствувал мирисот на стара прашина. Како да сме влегле во 1900 година – рекол Оливие Шопен-Жанври, аукционер и историчар на уметност кој прв влегол во станот.

Внатре во станот во Париз пронашле автентичен мебел од крајот на 19-ти и почетокот на 20-ти век, уметнички скулптури, слики, книги и лични предмети, сите внимателно зачувани и недопрени. Ѕидовите беа покриени со тапети од периодот „Бел Епок“, а писма, парфеми и љубовни пораки сè уште лежеа на масите – како времето целосно да застанало.

Најголемото изненадување дојде кога историчарите пронајдоа ремек-дело на познатиот италијански сликар Џовани Болдини – портрет на младата Марта де Флоријан, насликан кон крајот на 19 век. Болдини, познат како „сликар на елеганцијата“, беше меѓу најбараните портретисти на европската елита.

Сликата првично беше проценета на 300.000 евра, но поради огромниот интерес на аукцијата, достигна цена од 2,1 милиони евра, што ја прави најскапото дело на Болдини некогаш продадено. Ова откритие го привлече вниманието на колекционерите, историчарите и светската јавност, а приказната за „замрзнатиот стан“ ги обиколи сите водечки медиуми.

По сензационалното откритие, станот на Марта де Флоријан беше детално каталогизиран, а голем дел од предметите беа продадени на аукции низ целиот свет.

Според достапните информации од аукциските куќи и извештаите од 2010 година, станот сè уште е во приватна сопственост на семејството, но не е отворен за јавноста. Неговата точна локација никогаш не е официјално откриена, со цел да се заштити приватноста на наследниците и да се зачува вредноста на преостанатите предмети.

Иако семејството никогаш не дало официјални изјави за тоа дали некој го користи станот денес или дали во меѓувреме е реновиран, историските извори потврдуваат дека тој не е дел од јавни музеи или туристички тури и останува едно од најфасцинантните приватни сведоштва за едно време кое застанало.