Доцна синоќа во шестиот натпревар од финалната серија во Источната конференција составот на Милвоки славеше со резултат 118:107 против Атланта за вкупни 4:2.

Во победничките редови доминираше Мидлтон со 32 поени (седум асистенции), следен од Холидеј кој имаше 27 поени, по девет скокови и асистенции.

На спротивната страна за Хокси прв стрелец беше Редиш со 21 поен, еден кош повеќе од српскиот интернационалец Богдановиќ.

Бакси повторно ќе играат за НБА шампионскиот прстен, последен пат водеа битка за титулата во далечната 1974 година кога загубија од Бостон селтикс. Три години пред тоа успеаја да се искачат на тронот откако во финалето беа подобри од Балтимор булетс.

За својот втор трофеј ќе играат против Феникс санс кој во финалето на Западот со 4:2 го елиминираше Лос Анџелес клиперс.