ВИДЕО | Милевска: Пораките на ЕК и Борел одат во прилог на Северна Македонија
Не верувам дека Самитот ќе донесе големи промени. Бугарија јасно стави на знаење дека не планира да ги помести своите ставови.Околу прашањето зошто и како тоа Франција и ЕУ не можат да се справат со Бугарија и со Радев, сметам дека има два фактори, изјави во Утрински брифинг новинарката и дописничка на МИА од Брисел, Тања Милевска.
Според неа, едниот фактор е што Бугарија е клучна во инвазијата на Русија во Украина гледајќи од енергетска смисла и е постратешка и поважна за ЕУ од Македонија.
-Втора работа е што за разлика од спорот со Грција, ова е спор што „западњаците“ не го разбираат и им се чини тотално апстрактен, византиски, балкански. Мислам дека нашата дипломатија можеше многу повеќе да го објасни, вели Милевска.
Сега притисокот повеќе не е само врз Скопје туку и врз Софија, смета новинарката.
-Фактот што Борел и Европската Комисија за првпат дадоа рок дека мора преговорите да започнат во јуни повеќе и оди во прилог на Македонија отколку на Бугарија. Мислам дека Бугарија има многу повеќе интерес да се одолговлекува овој проблем. Така беше и со Грција на која и одговараше одолговлекувањето. Ова е максимумот што ЕУ со своите бирократски ограничувања може да го направи и е прилично храбро во рамките на своите ингеренции, иако ЕК ја нема таа моќ, вели Милевска.
Целиот разговор погледнете го во видеото: