Никој не ни претпоставуваше дека репрезентацијата на Мароко ќе се пласира во нокаут-фазата на Мундијалот во Катар, а уште помалку дека ќе заврши како првопласирана во групата „Ф“.

Мароканците во својот трет натпревар на Светското првенство ја остварија втората победа против Канада со 2:1.

Уште во четвртата минута по неверојатната грешка на канадскиот голман Милан Борјан стигнаа до предност со голот на Зијеш. Позитивата беше зголемена во 23 минута преку Ен Несири по асистенцијата на Хакими, а поразот беше ублажен со автоголот на Агуерд во 40 минута.

И Хрватите, светските вицешампиони, се осмифиналисти откако одиграа без голови 0:0 против Белгија, третопласираната на СП пред четири години.

Играчите на Роберто Мартинез напаѓаа со сите сили да ја остварат потребната победа, можеби најубавата шанса ја имаше Лукаку кој во 60 минута ја погоди стативата. Претходно иако беше досуден пенал за „коцкестите“, реагираа од ВАР собата утврдувајќи дека Ловрен е во офсајд.

На конечната табела Мароко е првопласиран со седум бодови, пред Хрватска со пет, Белгија заврши со четири, а Канада е последна без бодови.