Лос Анџелес Клиперс ја намали предноста на Феникс Санс (2:1) во финалната серија во Западната конференција во НБА лигата откако доцна синоќа славеше со резултат 106:92.

Домашниот тим подобро го отвори мечот со одлична прва четвртина, но потоа Феникс возврати со иста мера во втората и на паузата гостите заминаа со „плус два“ позитива. Но, во третата делница екипата од Лос Анџелес одигра феноменално, стекна двоцифрена разлика која во последните 12 минути рутински успеа да ја задржи.

Најзаслужен за победата на Клиперси беше Пол Џорџ со 27 поени, 15 скокови и осум асистенции, а ефикасен беше и Реџи Џексон кој додаде 23 поени.

На спротивната страна најдобро се истакна Диандре Ејтон со 18 поени и девет скокови, следен од Девин Букер и Крис Пол (12 асистенции) со по 12 поени.

Следниот четврти натпревар ќе се игра во ноќта помеѓу сабота и недела, исто така во Лос Анџелес.