Кинескиот пливач Чин Хајанг денеска го освои златниот медал во трката на 200 метри градно на Светското првенство во Фукуока, Јапонија, поставувајќи нов светски рекорд. Тој го исплива финалето за 2:05,48 минути, соборувајќи го светскиот рекорд поставен во мај 2022 година од Австралиецот Зек Стаблти-Кук, кој изнесуваше 2:05,95 минути.

Сребрениот медал го освои Стаблти-Кук (2:06.40), додека бронзата му припадна на Американецот Мет Фалон (2:07.74).

Чин претходно освои златни медали и во трките на 50 и 100 метри градно. Унгарецот Хуберт Кош го освои златото на 200 метри грбно, завршувајќи ја трката за 1:54,14 минути. Тој беше за 69 стотинки побрз од Американецот Рајан Марфи, актуелниот светски шампион. На последното скалило на подиумот се искачи Швајцарецот Роман Митјуков.

Јужноафриканската пливачка Татјана Скунмејкер го освои златниот медал во трката на 200 метри градно. Таа славеше со резултат 2:20,80 минути, пред Американката Кејт Даглас и Холанѓанката Тес Шаутен.

Актуелната олимписка шампионка го освои првото светско злато, по среброто на 100 метри, кое го освои и во Јапонија. Во последното денешно финале златниот медал го освоија пливачите на Велика Британија во штафетата 4х200 метри слободно. Тие славеа пред штафетите на САД и Австралија.