Португалскиот трговски брод Бом Исус (Добриот Исус) отпловил од Лисабон на 7 март 1533 година, за Индија. Бил натоварен со вреден товар – злато, сребро и слонова коска. За време на патувањето, го зафатила разорна бура, а на бродот и на неговиот екипаж му се губи секаква трага.

До 2008 година, се веруваше дека Бом Исус се наоѓа некаде на дното на океанот. Но, бродот сепак беше пронајден, и тоа на неочекувано место – во намибиската пустина. Сосема случајно го откопале локални рудари на дијаманти од компанијата „ДеБирс“ (DeBeers), кои работеле во таа јужноафриканска земја, пишува „Пункуфер“.

Потонатиот брод бил скриен во песокот и содржел околу 2.000 шпански и португалски златници, сребрени монети и бакарни шипки во вкупна вредност од околу 13 милиони долари.

Иако потонатиот брод скапувал речиси пет века и бил зачуван само мал дел од првобитната структура, вредните предмети биле пронајдени во релативно добра состојба.

 

View this post on Instagram

 

A post shared by Khan Teyim (@your_perspective_please)

Д-р Дитер Ноли, главен археолог на Јужноафриканскиот институт за поморски археолошки истражувања, ги предводеше ископувањата и тврди дека бакарните инготи пронајдени на бродот се одговорни за зачувување на богатството.

„Морските организми можеби сакаат дрво, корици за книги, семки од праска, јутани чанти и кожни чевли, но бакарот навистина ги одбива од нивната исхрана – така што многу работи преживеале 500 години на морското дно, што всушност не би требало“, рече тој.

На бродот биле пронајдени неколку вредни предмети, како што се стари компаси, чинии и прибор за готвење, мечеви, астрономски и навигациски алатки, пет сидра и топови.

Дури и 17 години по откривањето на потонатиот брод, не е сосема јасно што се случило со Бом Исус или како завршил во Намибија. Се претпоставува дека силна бура го повлекла до брегот, дека трупот се судрил со карпа и се превртел. Како што водата се повлекувала, низ вековите бродот „излегол“ од песокот.

Во секој случај, Бом Исус сè уште останува најстариот и највредниот бродолом што некогаш бил откриен во субсахарска Африка.