Денеска продолжија возбудувањата во Лига Европа со натпреварите од третото коло, во рамките од групата „Х“ во која Црвена звезда го запиша првиот триумф сезонава. Белградските „црвено-бели“ на домашен терен со 4:1 го надиграа Ференцварош кој славеше во првите две кола.

Во редовите на српскиот шампион Канга двапати се запиша во листата на стрелците, а по еднаш Митровиќ и Катаи, а на спротивната страна за Унгарците единствениот погодок беше дело на Закариасен.

Трабзонспор во истата група го претрпе и вториот пораз овојпат на гостувањето кај Монако со 3:1. За турскиот клуб стартер беше македонскиот репрезентативец Енис Барди кој настапи до 82 минута. На табелата води Ференцварош со шест бодови, колку што има и Монако, а по три Трабзонспор и Црвена звезда.

Во групата „Е“ Манчестер јунајтед потешко од очекувањата беше подобар од Омонија (2:3). Најпрвин во предност беа Кипраните по првиот дел со голот на Ансарифард во 34 минута, па пресврт направија „црвените ѓаволи“ благодарение на Рашфорд и Марсијал. Рашфорд придонесе и со втор гол во 84 минута по асистенцијата на Роналдо, а домаќините во следната минута само успеаја да го ублажат третиот пораз во ЛЕ преку Панајоту.

Во групата „Д“ Малме на нашиот Ердал Ракип (кој го одигра целиот меч и доби жолт картон во 42 минута) го претрпе и третиот пораз овојпат дома со 0:1 од Унион Берлин. Овој меч беше во 60 минута беше прекинат поради нереди на трибините.

Пред крајот на првото полувреме бундеслигашот остана без еден играч на теренот поради црвениот картон на Шафер. Но, ваквата предност не ја искористија Швеѓаните кои изненадувачки примија гол во 68 минута, радост за Германците им донесе Бекер.

Лига Европа, резултати –

Црвена звезда – Ференцварош 4:1
ХЈК – Лудогорец 1:1
Малме – Унион Берлин 0:1
Монако – Трабзонспор 3:1
Омонија – Манчестер јунајтед 2:3
Шериф Тираспол – Реал Сосиедад 0:2
Штурм Грац – Лацио 0:0
Цирих – ПСВ 1:5