Владата вчера преку соопштение извести дека поранешниот премиер Владо Бучковски е именуван за специјален претставник на нашата земја за Бугарија. Целта, како што велат, е успешно да се затворат отворените прашања со оваа соседна земја.

Именувањето е со мандат од една година, а целта да се назначи специјален претставник е да се заокружи со успех процесот на решавање на отворените прашања со Бугарија и да се создаде атмосфера за реализација на прашањата од интерес на двете земји опфатени со Договорот за пријателство и добрососедство, соопштија од Владата.

-Ова само го засилува напорот кој го демонстрира нашата влада – посветеност и решителност дека кај нас има сериозен напредок во имплементирање на договорот. Мислам дека со моето именување се испраќа силна порака до Софија, затоа што таму е неспорно дека во еден од контроверзните документи што го лиферуваа, а тоа е објаснувачкиот меморандум, моето име е споменато во контекст дека во изминатиов период сум бил во линија на бранење на основните постулати на договорот, така што очекувам во следните неколку часа да ја имаме првата средба со министерот за надворешни работи, околу координација, така што јас се вклуучувам во овој момент со силнма верба дека ќе дојдеме до решение. И да не дојдеме до решение до крајот на декември нема откажување – ќе продолжиме да ги бараме оние формулации кои на крајот ќе не доведат до вин – вин ситуација, вели Бучковски во Утрински брифинг.

-За заедничката историја не би давал дополнителни објаснувања што е она што треба ние да го направиме. Јас само го повторувам официјалниот став на Владата – има прашања за кои не се разговара, а тоа се идентитетските прашања, од друга страна ние сме прифатиле во Договорот дека имаме заедничка историја, но кои се оние заеднички настани и личности кои треба да ги чествуваме во духот на европските вредности, треба да се договорат експертите од заедничката комисија. Се надевам дека и покрај притисоците од јавноста тие ќе продолжат професионално да си ја вршат работата, смета Бучковски.

-Ние никако не може да го свртиме тркалото, да ја промениме историјата. Климата не е поволна. Доминира говор на омраза, треба да се спушти топката, да се биде трпелив, а за нас најсилното оружје кое го имаме е Договорот за пријателство и соработка. Ќе се обидиме и со моето назначување да испратиме позитивен сигнал дека ние не бегаме од отворањето на контроверзните теми од историјата, но во секој случај лицитирањето со решенија кои би ги лиферувала заедничката комисија мислам дека би наштетило на овој процес, во оваа чувствителна фаза.

Целиот разговор со специјалниот претставник на С Македонија за Бугарија, Владо Бучковски погледнете го во видеото: