Денеска е Меѓународниот ден на толеранцијата која се одбележува во сите земји во светот со манифестации низ кои се слават различностите и граѓаните се поттикнуваат на толеранција, почитување, љубов и разбирање како универзални вредности на кои треба да почива едно демократско општество.

Во 1996 година, Генералното собрание на ОН ја усвои Резолуцијата 51/95 со која 16 ноември се прогласува за Меѓународен ден за толеранција.

Ова дејство следеше по усвојувањето на Декларацијата за принципи за толеранција од страна на земјите-членки на УНЕСКО на 16 ноември 1995 година. Меѓу другото, Декларацијата потврдува дека толеранцијата не е ниту попустливост, ниту рамнодушност. Тоа е почит и ценење на богатата разновидност на културите на нашиот свет, нашите форми на изразување и начините да се биде човек. Толеранцијата ги признава универзалните човекови права и основните слободи на другите. Луѓето се природно различни; само толеранцијата може да обезбеди опстанок на мешаните заедници во секој регион на земјината топка.

„Толеранцијата е почит, прифаќање и ценење на богатата разновидност на културите во нашиот свет, нашите форми на изразување и начини да се биде човек“, се нагласува во Декларацијата на УНЕСКО.

Врз принципите на толеранција, разбирање и почитување е изградено и македонското општество како мултиетничко, мултирелигиозно и мултикултурно.

Граѓаните кои ги анкетиравме говорат дека се толерантни и потврдуваат дека целото општество е толерантно и ги почитува различностите, културите и традициите во државата.

-Пред два дена се вратив од Израел каде живеев 4 години и можам да кажам дека македонското општество е потолерантно, самата состојба во Израел покажува дека таму нема многу толеранција, но како и да е како општество треба да учиме од таму некои други работи околу државата, зошто искрено по четири години, овдека како да застанало времето. Тоа ме разочара, ама дома си е дома, вели еден од граѓаните во анкетата на „Слободен печат“.

Погледнете ја анкетата која ја подготви колешката Александра Вуксановиќ: