Неколку сообраќајници во Скопје од денес ќе бидат затворени поради Министерскиот совет на ОБСЕ што ќе се одржува во Спортско-рекреативниот центар „Борис Трајковски“. „Слободен печат“ ги праша граѓаните што очекуваат од претстојниот самит и дали им пречат затворените улици?

Генерално се со поделени мислења. За едни ова е настан што еднаш се случува, за други е чист популизам пред избори.

-Само трошење пари ништо друго. Нема да имаме никаков бенефит. Со кола сум и не можам да отидам кај што треба- вели еден скопјанец.

Друг објаснува дека ваков настан по втор пат Македонија нема да доживее.

-Поголем бенефит од домаќинството на ОБСЕ не може да има. Не ни пречат блокираните улици, па Премиер или министер кога поминува ги блокираат, ќе издржиме два дена- вели граѓанинот.

Друг едноставно нема мислење за самитот.

-Искрено не знам што значи самитот на ОБСЕ. Воопшто не ми пречат блокираните улици. Иако не живеам тука, Скопје е прекрасен град по кој може да се оди пеш. Нестварно е зошто луѓето користат јавен превоз, не сум видел подобра инфраструктура од Скопје иако сум прошетал многу- вели еден господин.

Друг објаснува дека самитот на ОБСЕ е голема работа, и мисли дека Македонија ќе има бенефит од настанот. Не му пречат блокираните улици бидејќи вели дека се е добро организирано.

-Мора да има безбедност во цела Европа. Нема пречка со блокираните улици, доаѓаат големи делегации и мора да биде тоа така, мораме да бидеме трпеливи- вели тој.

За друг пак цела организација е негативна.

-Светот се распаѓа, ова е фарса некоја. Ние дома не можеме да си ги средиме работите, штрајкува цела држава. Нас не ни треба ова, нас ни требаат пари. Не знам зошто ги блокираат улиците, тоа е глупа работа. Ова е само популизам пред избори. Се е испревртено- вели тој.“

Целата анкета на нашиот колега Стефан Крстески погледнете ја во продолжение: