Американскиот пливач оствари нов светски рекорд од 23,71 секунди во Гринсборо, Северна Каролина, во дисциплината 50 метри грбно.

Хантер Армстронг го направи овој резултат во рамките од американските квалификации за Светското првенство.

Досегашниот рекорд го држеше рускиот пливач Климент Колесников кој имаше време од 23,80 секунди.

Армстронг (21) инаку е освојувач на златен олимписки медал во Токио со штафетата 4×100 мешовит стил.

– Не знам што да кажам, искрено. Тоа е нешто што отсекогаш сум го посакувал и моментално сум воодушевен – рече Армстронг, кој обезбеди пласман на Светското првенство годинава во Будимпешта, Унгарија (од 18 јуни до 3 јули).

Меѓу другото, учество на Светското првенство во дисциплината 100 метри делфин стил обезбеди и седумкратниот олимписки шампион Калеб Дресел. Тој ќе се натпреварува и на 100 метри слободно и 50 метри делфин во Будимпешта.