Според првите резултати од истражувањето, вештачката интелигенција би можела да помогне во подобро дијагностицирање на ракот на дојката, особено во земјите каде што нема доволно радиолози.

Лекарите и научниците од шведскиот универзитет Лунд открија дека скринингот со мамографија со помош на вештачка интелигенција речиси го преполовил работното оптоварување на радиолозите во текот на рандомизирана студија на шведската национална програма за скрининг на рак на дојка.

„Скринингот за мамографија со помош на вештачката интелигенција резултираше со слични стапки на откривање на ракот во споредба со стандардното двојно читање, со значително помал товар при читањето на екранот, што покажува дека употребата на вештачката интелигенција при мамографскиот скрининг е безбедна“, заклучија истражувачите.

„Првите резултати за група од над 80.000 жени во Шведска, откриваат дека скринингот со поддршка на вештачката интелигенција открил 20 отсто повеќе видови на рак во споредба со рутинското двојно читање на мамографот од двајца специјализирани радиолози“, додал тимот.

Тие истакнале и дека резултатите од истражувањето нема да бидат конечни уште неколку години.

So what did it show? Basically that an AI software tool use upfront in breast cancer screening analysis could help rank & prioritise mammograms for human analysis. In so doing ⬆️detection rate ⬇️ manpower needs. 2/n

— Dr Robert O’Connor (@DrRobertOConnor) August 2, 2023

Научниците, чии наоди беа објавени во списанието „Лансет онколоџи“ (Lancet Oncology), рекле дека останува да се види како употребата на вештачка интелигенција влијае на откривањето на ракот во периодот помеѓу редовните скрининг прегледи пред да се одлучи дали употребата на вештачка интелигенција во мамографијата е оправдана.

„Ние сè уште мора да ги разбереме импликациите за исходите од здравјето на пациентите, особено дали комбинирањето на стручноста на радиолози со вештачка интелигенција може да помогне во откривањето на ракот во тригодишни интервали помеѓу редовните прегледи кои честопати се пропуштаат од традиционалните скрининг, како и исплатливоста на технологијата“, рекла Кристина Ланг од Универзитетот Лунд.

Тимот исто така рекол дека помошта од вештачката интелигенција можеби е потребна во земјите кои немаат доволно радиолози.

„Има недостиг од специјалисти радиолози на дојка во многу земји, вклучително и недостиг од околу 41 радиолог (8 отсто) во Велика Британија во 2020 година и околу 50 во Шведска, а потребна е повеќе од една деценија да се обучи радиолог способен да толкува мамографија“, рекле научниците.