Основното јавно обвинителство Кавадарци поведе постапка против 45-годишен велешанец, за посредување во вршење проституција.

Од 2016 до 2022 година, тој во повеќе наврати вршел семејно насилство врз својата сопруга, така што со примена на сила, тепајќи ја и давајќи и дроги, ја наведувал на проституција. Тој се договарал со различни лица и ја носел жената во Кавадарци за да ја принудува да има сексуални односи со неколку лица во ист ден за што наплаќал пари.

Имајќи предвид дека во конкретниот случај постојат околности кои упатуваат на можност осомничениот да се даде во бегство, особено со оглед на високата запретена казна за ова кривично дело во траење од најмалку 10 години, надлежниот јавен обвинител до судијата на претходна постапка од Основниот суд во Кавадарци достави предлог за определување мерка притвор.