Е. Пелистер в петок со почеток од 20.30 часот ќе го игра полуфиналниот натпревар од СЕХА Газпром лигата против Веспрем од Унгарија на Фајнал-фор турнирот во Задар, Хрватска.

Во второто полуфинале од 18.00 часот е хрватската пресметка помеѓу Нексе и ППД Загреб.

Веспрем во Задар ќе ја брани титулата во регионалното натпреварување и е фаворит против битолчани кои од друга страна ветуваат дека ќе го дадат максимумот и се обидат да се најдат во финалето закажано е за 4 септември од 19.00 часот.

– Кога бев дете Пелистер беше голем клуб. Кога си на моите години понуда од клуб како Е. Пелистер не се одбива. Постоеше шанса да дојдам со високи амбиции во клубот и таа шанса не ја испуштив. Ние сме тим во изградба, имаме 10 нови ракометари и нов тренер и падови и подеми се нормална појава. Водевме цело време против Мешков Брест, го имавме Урбан на голот и со малку среќа победивме. Нема што да загубиме утре во полуфиналето. Ништо не се знае, ова е спорт и сите опции се отворени – рече тренерот на македонскиот вицешампион, Ларс Валтер на денешната прес конференција.

Значаен придонес за пласманот во полуфиналето имаше словенечкиот голман на Е. Пелистер, Урбан Лесјак, кој вели дека екипата заслужено е на Ф4 турнирот со најдобрите.

– Првите впечатоци од Битола се одлични. Веднаш почувствувавме дека сме во градот на ракомет. Луѓето таму „луди“ по овој спорт и што е многу важно – го разбираат спортот. Верувам дека ќе ни бидат голема поддршка во текот на сезоната. Да не размислувавме дека имаме шанси немаше ни на дојдеме во Задар. Натпреварот почнува со 0:0 и верувам дека ќе се претставиме во најдобро светло. Заслуживме да бидеме тука и да се натпреваруваме со најдобрите – се зборовите на Лесјак.