Кениската полиција ексхумираше 47 тела на луѓе за кои се верува дека припаѓаат на христијанска секта, кои верувале дека ќе одат во рајот ако се изгладнат до смрт, пренесува Ројтерс. Во петокот, полицијата почнала да ископува човечки останки во шумата Шакахола во близина на крајбрежниот град Малинди.

„Вкупно 47 лица загинаа во шумата Шакахола“, изјави полицискиот истражител Чарлс Камау за Ројтерс. Ексхумациите се уште се во тек, додаде тој. Претходно овој месец, полицијата спасила 15 следбеници на Меѓународната црква „Добри вести“, на кои им било речено да умрат од глад.

Четворица од нив починале пред да стигнат во болница, соопшти полицијата. Црковниот водач Пол Мекензи беше уапсен по извештаите за плитки гробници во кои имало најмалку 30 следбеници. Локалните медиуми, повикувајќи се на полициски извори, објавија дека Мекензи одбил да јаде или пие во полицискиот притвор.

Министерот за внатрешни работи Китуре Киндики рече дека целата шума од околу 3.200 квадратни метри е затворена и прогласена за место на злосторство.

„Оваа страшна црна дамка на нашата совест мора да доведе не само до најстроги казни за сторителите на ова злосторство врз толку многу невини души, туку и до построга регулација (вклучувајќи и саморегулација) на секоја црква, џамија, храм или синагога од сега натаму“, рече тој.