Уште една недела може да се аплицира за локации за поставување подвижни „продавнички“ во Центар
Општина Центар ги потсетува граѓаните дека сѐ уште е активен јавниот повик за користење локации за поставување подвижни објекти и апарати на подрачјето на општината.
Подвижните апарати за продажба на сладоледи, пијалаци, пуканки, крофни, палачинки и други производи, ќе може да се поставуваат на 14 атрактивни и фреквентни локации во Центар и тоа на Сквер Јадран, пред Македонска опера и балет, во Паркот на Франкофонија, кај Порта Македонија, кај паркот „Жена борец“, во ГТЦ, пред административната зграда на Општината и кај Рекорд.
Целосната листа на сите локации со координати, заинтересираните може да ја најдат на општинската веб-страница.
Станува збор за специјализирани возила за улична продажба, со должина од 4 метри, висина до 3 метри, поставени на површина до 16 квадратни метри, во што влегува подвижниот објект, подвижниот апарат или друга направа, манипулативниот простор и урбаната опрема (канта за отпадоци). Учесниците на повикот треба да имаат регистрирано дејност во Централниот регистар. Должни се да поднесат потврда за исполнети технички услови за вршење на дејноста, опис и фотографија на подвижниот објект што ќе го користат и уплатница од 1.000 денари на сметка на Општина Центар. За поднесените барања ќе важи принципот „прв дојден – прв услужен“ – информираат од Центар.
Рокот за поднесување на пријавите е до 14 март, а барањата се доставуваат во Архивата на Општина Центар, секој работен ден од 9 до 15 часот.