Во последниве девет месеци од годинава најчести причини за случените сообраќајни несреќи на поширокото тетовско подрачје се неприлагодена брзина според условите на патот (172 несреќи), неправилно вршење на дејствие (158 несреќи), недавање на првенство (97) и така натаму. Во овој период најголем бил и бројот на преземените мерки за пречекорување на максимално дозволената брзина (вкупно 5714), што само потврдува дека возачите во значителен број неодговорно и ризично се однесувале во сообраќајот кога станува збор на брзината и негативно влијаеле на севкупната сообраќајна безбедност на подрачјето.

„Слична е состојбата и на гостиварското подрачје, каде во деветте месеци била изречена 3161 мерка за неприлагодена брзина, односно за возење со поголема брзина од пропишаната, пред се на автопатот Гостивар-Тетово-Скопје и магистралниот пат Гостивар-Кичево, но и на околните регионални патишта.А, дури 112 од несреќите, инаку биле последица на неприлагодена брзина, 53 на неправилно вршење дејствие и друго“, соопшти портпаролот на СВР Тетово Марјан Јосифоски.

Од Секторот за внатрешни работи Тетово, велат дека ќе продолжат со континуирани активности на планот на откривање и санкционирање на пребрзите возачи, зашто токму неприлагодената брзина речиси во најмногу од несреќите резултирала со мошне сериозни последици по учесниците во сообраќајот и со голема материјална штета.

Оттаму, повторно се апелира до возачите да се придржуваат на важечките ограничувања, правила и прописи кои се однесуваат на дозволената брзина согласно Законот за безбедност на сообраќајот на патиштата.