Низ разговор за трите последни романи на Владо Јаневски, на 24 јуни, во 19 часот, авторот ќе биде претставен во просториите на Друштвото на писателите на Македонија во Скопје. Промоторка ќе биде Ана Пејчинова, а извадоци ќе чита Емилија Тодорова.

Владо Јаневски е македонски писател, сликар и стрип-автор. По завршувањето на високо образование на УКИМ во Скопје, од 1989 година живее во Сиднеј, Австралија. Инспирацијата за пишување најчесто ја црпи од многубројните патувања по светот (престојувал во преку 70 земји). Неговото творештво се одликува со мултижанровски пристап, честопати комбинирајќи елементи на магичен реализам.

Литературниот опус на Јаневски се состои од шест романи за возрасни: „Кој го уби Едгар Алан По“ („Или-или“, Скопје, 2024), „Смртта не е крај“ („Арс Ламина“, Скопје, 2022), „Мртвите знаат најдобро“ („Арс Ламина“, Скопје, 2020), „Чудо зад аголот“ („Пагома прес“, Скопје, 2020), „Под друга капа“ („Магор“, Скопје, 2019), „Made in Jabana“ („Слово“, Скопје, 2004); збирка наградувани раскази „Нема враќање“ („Студентски збор“, Скопје, 1985) и збирка поезија „На грбот на неповратот“ (Агенција за иселеништво, Скопје, 2024).

Добитник е на повеќе книжевни награди, меѓу кои и наградите за краток расказ на „Студентски збор“ и „Нова Македонија“, за најдобар роман „Пегаз“, за најдобра поетска збирка „Стојан Христов“, за најдобро сценарио за долгометражен филм „Скрипт Фест“ и за најдобри бајки „Современи бајки од Македонија“.

Добитник е и на наградата „Македонски корени“ за постигнувања во литературното и ликовното творештво, доделена на Меѓународниот фестивал „Книжевен круг“ во 2024 година. Оваа година, неговиот роман „Кој го уби Едгар Алан По“ беше во потесен избор за наградите „Стале Попов“ и „Роман на годината“.

(Текстот е објавен во „Културен печат“ број 286, во печатеното издание на весникот „Слободен печат“ на 21-22.6.2025)