Во претходната година, вредноста на трговијата со земјоделски производи меѓу ЕУ и остатокот од светот достигна 424,7 милијарди евра, што е за 77,5 милијарди евра повеќе од 2021 година, се наведува на веб-страницата на Евростат, објави Данас.рс.

ЕУ извезла земјоделски производи во вредност од 229,1 милијарди евра, а увезла 195,6 милијарди евра, што резултирало со суфицит од 33,5 милијарди евра.

Помеѓу 2002 и 2022 година, трговијата со земјоделски производи во ЕУ се зголеми речиси тројно (од 141,5 милијарди евра на 424,7 милијарди евра), што е еквивалентно на просечен годишен раст од речиси 5,6 проценти. Во овој период извозот пораснал побрзо (5,9 отсто) од увозот (5,4 отсто).

Во однос на извозните партнери, Велика Британија беше главен партнер со 21 процент удел во земјоделскиот извоз надвор од ЕУ (што е еквивалентно на 47,8 милијарди евра), потоа САД (13 проценти; 29,0 милијарди евра), Кина (седум проценти; 15,2 милијарди евра), Швајцарија (пет проценти; 11,5 милијарди евра), Јапонија (четири проценти; 8,3 милијарди евра) и Русија (три проценти; седум милијарди евра). Како што пишува Еуростат, увозот надвор од ЕУ главно доаѓа од Бразил (10 отсто; 19,9 милијарди евра), Обединетото Кралство (осум отсто; 16,4 милијарди евра), Украина (седум отсто; 13,1 милијарди евра), САД (шест отсто ; 12,3 милијарди евра), Кина (речиси шест проценти; 10,8 милијарди евра) и Норвешка (пет проценти; 9,3 милијарди евра).