Израел и Белата куќа ги осудија вчерашните изјави на Доналд Трамп во кои тој ја пофали милитантната група Хезболах поддржана од Иран и го критикуваше израелскиот премиер Бенјамин Нетанјаху поради нападот на палестинскиот Хамас во кој загинаа повеќе од 1.300 луѓе во Израел.

Трамп, поранешниот републикански претседател кој е фаворит за претседателската номинација на партијата во 2024 година, го нарече либанскиот Хезболах, заколнатиот непријател на Израел, „многу паметен“ и го обвини Нетанјаху дека не бил подготвен за нападот на Хамас во кој загинаа и американски граѓани.

Израелскиот министер за комуникации Шломо Кархи рече дека коментарите на Трамп пред поддржувачите и во телевизиско интервју во средата вечерта покажале дека не може да му се верува.

„Срамно е таков човек, поранешниот претседател на САД, да поттикнува пропаганда и да шири работи што го повредуваат духот на израелските борци и граѓани“, изјави Кархи за израелскиот Канал 13.

Заменик-секретарот за печат на Белата куќа, Ендрју Бејтс, ги нарече коментарите на Трамп „опасни и непромислени“. „Ние сме целосно во загуба зошто некој Американец некогаш би ја пофалил терористичката организација поддржана од Иран како „паметна““, рече Бејтс.

Демократскиот претседател Џо Бајден го осуди нападот на Хамас како „чин на чисто зло“ и изрази непоколеблива поддршка за Израел. Синоќа Трамп објави соопштение во кое рече дека нема „подобар пријател или сојузник на Израел“ од времето кога тој беше претседател на САД.

Неколку противници на Трамп во трката за републиканците исто така го критикуваа поранешниот претседател.

Трамп и Нетанјаху имаа блиски односи за време на мандатот на Трамп. Но, на Трамп му пречеше тоа што Нетанјаху му честиташе на Бајден за победата на претседателските избори во 2020 година, кои Трамп сè уште ги нарекува лажни.

Израел вети дека ќе го уништи движењето Хамас што владее со Појасот Газа како одмазда за најсмртоносниот напад врз цивили во израелската историја, кога стотици вооружени мажи ја преминаа границата и дивееја низ израелските градови во саботата.

Израелските власти соопштија дека бројот на загинати внатре во Израел се искачи на повеќе од 1.300. Повеќето се цивили убиени во своите домови, на улиците или на забава. Властите во Газа соопштија дека повеќе од 1.500 Палестинци биле убиени, а над 6.000 ранети во одмазднички израелски воздушни напади.