Претседателот на пратеничката група на Алијансата за иднината на Косово, Бесник Тахири изјави дека ставот на неговата партија е јасен, а тоа е дека треба да има единствена влада со Самоопределување, но без премиерот Албин Курти, пренесува Газета експрес. Тахири истакна дека тоа не е илузија и дека Курти е во многу лоша ситуација.

„Имавме многу јасен политички курс и јасен став, гласавме во Собранието за прашања кои мислиме дека се добри за Косово. Но, патот по кој Курти оди го води Косово во ќорсокак. Илузија е да се мисли дека Курти ќе поднесе оставка или ќе им даде наредба на пратениците да го распуштат Собранието“, рече Тахири.

Според него, единствен начин е да се поднесе предлог до Собранието за разрешување на Курти. Тој призна дека опозицијата нема доволно гласови за да ја собори актуелната влада, но рече дека има единство против Курти поради неговиот однос со меѓународните сојузници.