Светислав Пешиќ ќе биде новиот селектор на српската кошаркарска репрезентација. Србија не се пласираше на Олимписките игри во Токио, а по финалето на квалификацискиот турнир во Белград и поразот од Италија, веќе се шпекулираше за заминување на Игор Кокошков и кандидатите за нов селектор.

Иако Кошаркарската федерациј на Србија сè уште официјално не ја потврдила информацијата за заминувањето на Кокошков и доаѓањето на Светислав Пешиќ, сè поизвесно е дека оваа соработка е договорена и дека официјално ќе биде објавена наскоро, дознава „Спорт Клуб“.

Пешиќ се искачи на светскиот престол со Југославија во 2002 година, а сега ќе има полни раце работа со Србија, со оглед на тоа што „орлите“ ги очекуваат квалификациите за Светското првенство.

Првиот прозорец ќе се одигра во ноември, а Србија ќе се сретне со Летонија на 25 ноември. Три дена подоцна, ќе гостува кај Словачка. Во групата „А“ игра и Белгија, а пласманот во второто коло од квалификациите ќе го обезбедат трите најдобри селекции.

Во својата голема и трофејна кариера со југословенската репрезентација, Пешиќ ја освои европската титула во 2001 година во Турција и светската титула следната година во Индијанаполис. На клупско ниво, тој ја освои Евролигата со Барселона во 2003 година и Еврокупот со Жирона четири години подоцна.